Luke 3

Jon Baptis tebe God imi weng baga-emsa uta ko

Mat 3:1-12, Mak 1:2-8, Jon 1:19-28

1Taiberius iyo Rom kasel imi king ke-bii atol te tam mit kaa fogo te yak tiin milii fogo (15) kela e, Pontius Pailat yagal Provins Yuudiya umi tiin molin kela e, Herot yagal Provins Galili umi tiin molin kela e, Herot imi fik Filip yagal Provins Ituria sino Provins Trakonitis sino umi tiin molin kela e, Lisanias yagal Provins Abilene umi tiin molin kela e minte, 2alol Anas sino ilami muuliim Kayafas sino umdim iyo Juda kasel imi tinum amem ko age pris imi kamogimal miton kelip no kale,

kota Sekaraya imi man Jon iyo tinum binim iibaan kugol bom-balata, God iyo Jon ulaa du bogobe-nala e, “Nimi weng uyo kwep no unang tinum imi baga-emal o,” agela e, 3Jon iyo daage no alugum abiip maak maak ok Jodan baang kutam iyo God imi weng uyo baga-e-bom-nala e, “Fupkela ipmi fengmin uyo kupka-nilip meng ok sam ugolipta, God iyo ipmi fengmin uyo kupkan kebela binimanuk o,” agan-bom baga-ema kale, 4ulutap mungkup God imi profet Aisaya iyo sugayok suuk kon tem dola ko bogo-nala e,

• “Tinum maak iibaan kugol ol-bom bogo-nala e, ‘Ilep tambal umaak telelamipta, Kamogim iyo yuut talak o ageta kale,

5alugum iluung degep daak unan un-suu uyo kafin kulu-nilip itolip mitam tulu e minte, alugum muk kun sino amdu so uyo belela-nilip ifi-nilip e minte, ilep dagal dagal uyo telelalip tolanu e minte, ilep mafak tuum tem ilep uyo telelalip tambalan no keluta, 6God imi tinum ulaa dula iyo talata, alugum unang tinum iyo atamipta, numi ilim bolan-tema tinum iyo kulba kalaa agelan-temip o,’ age-nala e, tinum beyo felep yak aget telelamin umi diim to fomtuup weng boyo baga-e-be o,” age Aisaya iyo bogosa ko. 7Unang tinum kwiin tagang iyo, tal tamupta, Jon ita ok sam ugobelak o age-nilipta, imi finang uyo tala tala ke-bilip kuta, Jon iyo utamata e, imi aget uyo fupkela kolin-tem ke tilip kalaa age-nalata, bogobela, “Ibaa. God iyo tebe ipmi kuguup mafak umi kalan uta ifak daalan-tema kale, ibo aget fuguno-nilip e, no tamup Jon imi ok sam ugobelan-tema uta, God tebe numi kaal fuyap kopman-tema uyo uk kugan imolan-temu ko ageta talan-bom-nilip e minte, ibo inap imi baam atul finano bilii unan-nuubip ulutap ke-nilipta, nimi finang talan-bom no ke-bilip kuta, boyo ibo uk kugan imolan-temaalu binim kuba. 8Kuguup tambal uta ke-bilipta, boyo utamita e, ipmi aget uyo fupkela ko-nilipta, ipmi kuguup mafak uyo kupkabip kalaa age utaman o ageta ko. Kale ibo nimi weng kaa bogobelan-temi koyo tinangku-silipta. Ibo, ‘Nuta Abraham imi man ilop o,’ age deng taban-bilip kuta, kanube God iyo, Abraham imi man ilop kemin boyo miton o agan-be nimnam, God beyo tii kale, daak tuum boyo kulu-nala telela imola mitam tinum ke-nilipta, igil mungkup Abraham imi man ilop kwiin tagang kelan agin kuta, God imi tiin diim uyo Abraham imi man ilop kemin boyo fen katip kalaa agesa ko. Kale ibo bogo-nilip, ‘Abraham beyo numi afalik kale, God iyo bemi tolop o age-nalata, nuyo telela imola tambaliim nan-temup o,’ agan-kalin ba kale, ipkil God imi ilak uyo duga-bilipta o ageta ko. 9Kale God iyo, at uyo doman o age-nalata, at miit tem kal kaabak uyo waafuu fiko kola kale, at alugum dogap uta at dum tambal abulin binim kesu uyo ano duula-nalata, at kwegala ken tebelan-temu ko. Ulutap kale, ibo kuguup tambal uyo waafulin binim kelan-temip uyo, God tebe imkan kelan-tema o,” age Jon iyo unang tinum imi baga-ema e, 10iyo daga-nilip e, “Kuta nuyo, ‘Intaben nu-bilipta o,’ agan-balap o?” agelip e, 11Jon iyo bogola, “Dogap kapta siyot alop sino umdii, maak uyo ku tinum maak bisop alba bemi kobelal a. Minte dogap kapta iman sino umdii, taga-e-bomta o,” agela ko.

12Kale tam takis mani kwaamin tinum bilip iyo, tal tamup Jon ita ok sam ugobelak o age-nilip e, tal Jon iyo dagalip ko. “God imi weng kafalemin kabaa. Nuyo, ‘Intaben nu-bilipta o,’ agan-balap o?” agelip e, 13iyo bogobe-nala e, “Ibo mani kwiin tagang uyo kwaamin ba kale, gavman imi weng kwep daa-nilip, ‘Kanupmin kal o,’ agebip bota kup kulugamin o,” agela e minte, 14tam waasi dinan-kalin tinum bilip igil asok Jon daga-nilip e, “Minte nule a? Nuyo, ‘Intaben nu-bilipta o,’ agan-balap o?” agelip e, Jon iyo bogobela, “Ibo unang tinum iyo finanin weng uyo bogobe-nilip e, ‘Kangkolan-temup min, kamdep no weng telelmin tinum imi diim daa bisop weng bogobelupta, de kamolan-temip o,’ agelipta, ipmi atul uyo finan-bom-nilipta, bilip imi mani uyo ibo kupka-em-nuubip ko. Kale kanumin boyo kupka-nilipta, ilipmi ogok kemin umi tisol uta kup kulu-nilipta, maak sino kwaamin ba o,” agela ko.

15Tam unang tinum iyo Jon imi kuguup kanubela uyo utam-nilip e, bubul kup milip age-nilip e, Jon bemi aget yamyam fugun-bom-nilip e, “Beyo God imi tinum, ‘Ulaa duli kamok kesata, daali tolon-tema o,’ agesa ita tap o,” agan-kalip ko. 16Tam Jon iyo alugum imi bogobe-nala e, “Ipmi, tinum tolon-tema o age fen-bilip iyo naga ba kale, beyo kamok miton kale, ita ita ke niyo kubagani nimkasa kalaa age-nilita, fitom tebepnebu kale, niyo fen tinum kale, niyo bagang-kale yang bemi miit tem uyo yang-nilita, imi yaan ilom sok uyo tiila kopmomi binim ko. Kale niyo ok uta ku-nilita, ibo ok sam uga-e-bii kuta, tinum tolon-tema bemi ok sam uga-eman-tema boyo fen ok ba kale, ilami Sinik Tambal ita daala tebe-nalata, ipmi iibak tem aget mafak fugunin uyo at kwegabela ken tebeluta, ibo atin tambalanan-temip ko. 17Tam tinum imi sagam ku rais ko age wiit uyo bo-bii kulep tal to-nilip e, telela-bii, umi kaal uyo kugan ke-nilip e, wiit dam uta kup kulep tam am to-nilip e minte, kaal uta abulalip ken tebe-bom no kemin ko. Kale mungkup ulutap kale, tam tinum tolon-tema beyo unang tinum iyo ilo ko-nilita o age-nalata, ilami ilak dosip iyo afeta ko kulep no ilami abiip to-nala e minte, unang tinum imi ilak dolin binim ita at tenogamin binim, kenamin kup bomu umi tem kugol abulala ken tebeman-temip o,” agela ko.

18Tam Jon iyo kanube baga-e-be kota, God imi weng tambal uyo baga-e-bom-nala e, unang tinum imi bubul uyo kufu-e-balata, imi bubul aa aget aa uyo fupkelalin o ageta baga-ema ko.

Herot imi tebe un tubulin bogobela Jon sok de dosip uta ko

(Mat 14:3-4, Mak 6:17-18)

19Herot beyo Provins Galili kutam imi kamok king kale, ilami imdalim iyo kaanin-tem bom-salata, tebe-nala e, imdalim kalel Herodias uyo tagaa kube-nala e minte, kuguup mafak mafak kwiin tagang uyo ke-bom no kem-nuubata, tam Jon iyo Herot imi kuguup mafak uyo kanuma kalaa age-nalata, an-togon daa yege-balata, tam Herot iyo olsak tebebelu e, 20asok kuguup mafak maak ke-nala e, imi un tubulin iyo bogobelata, talta Jon iyo sok de do dep no kalabus am daalip bii-se ko.

Jon tebe Yesus imi ok sam ugobesa uta ko

Mat 3:13-17, Mak 1:9-11

21Jon iyo sok de dolin-tem bom-silipta, unang tinum kwiin tagang iyo alugum tal Jon imi diim tamip e, Jon ita ok sam uga-e-bom bom-balata, Yesus iyo aaltam tal atam-nala e, Jon imi bogobe-nala e, “Ok sam ugopne o,” agelata, Jon iyo tebe Yesus ok sam ugobelata, Yesus iyo beten kem-salata, abiil tigiin uyo tem kalo kolu e, 22God imi Sinik Tambal iyo uun abim umi dam ulutap ke-nalata, Yesus imi diim abela e, abiil tigiin kwiit ilota God imi weng kwaala tulu kwek uyo bogo-nala e, “Kabo nimi Man bubul kale, niyo kapmi deng kup taban-bii o,” agela ko.

Yesus imi afaligal imi win uta ko

Mat 1:1-17

23Yesus iyo bii atol ulumi kup 30 umaak ke-nalata, kota imi ogok kufo-nala e, ogok kemsa ko. Alugum unang tinum iyo, “Yesus iyo Josep ilami man ko,” agan-nuubip kuta, God ilami Man kale,

Josep iyo Heli imi man e minte,

24Heli iyo Matat imi man,

Matat iyo Livai imi man,

Livai iyo Melki imi man,

Melki iyo Janai imi man,

Janai iyo asegim Josep imi man,

25Josep iyo Matatias imi man,

Matatias iyo Amos imi man,

Amos iyo Naham imi man,

Naham iyo Esli imi man,

Esli iyo Nagai imi man,

26Nagai iyo Mat imi man,

Mat iyo asegim Matatias imi man,

Matatias iyo Semen imi man,

Semen iyo Josek imi man,

Josek iyo Joda imi man,

27Joda iyo Joanan imi man,

Joanan iyo Resa imi man,

Resa iyo Serubabel imi man,

Serubabel iyo Sealtiel imi man,

Sealtiel iyo Neri imi man,

28Neri iyo asegim Melki imi man,

Melki iyo Adi imi man,

Adi iyo Kosam imi man,

Kosam iyo Elmadam imi man,

Elmadam iyo El imi man,

29El iyo Josua imi man,

Josua iyo Eliesa imi man,

Eliesa iyo Jorim imi man,

Jorim iyo asegim Matat imi man,

Matat iyo asegim Livai imi man,

30Livai iyo asegim Simeon imi man,

Simeon iyo asegim Juda imi man,

Juda iyo asegim Josep imi man,

Josep iyo Jonam imi man,

Jonam iyo Eliakim imi man,

31Eliakim iyo Melea imi man,

Melea iyo Mena imi man,

Mena iyo Matata imi man,

Matata iyo Natan imi man,

Natan iyo Devit imi man,

32Devit iyo Jesi imi man,

Jesi iyo Obet imi man,

Obet iyo Boas imi man,

Boas iyo Salmon imi man,

Salmon iyo Nason imi man,

33Nason iyo Aminadap imi man,

Aminadap iyo Atmin imi man,

Atmin iyo Ani imi man,

Ani iyo Hesron imi man,

Hesron iyo Peres imi man,

Peres iyo Juda imi man,

34Juda iyo Jekop imi man,

Jekop iyo Aisak imi man,

Aisak iyo Abraham imi man,

Abraham iyo Tera imi man,

Tera iyo Naho imi man,

35Naho iyo Seruk imi man,

Seruk iyo Reu imi man,

Reu iyo Pelek imi man,

Pelek iyo Ebe imi man,

Ebe iyo Sela imi man,

36Sela iyo Kainan imi man,

Kainan iyo Apaksat imi man,

Apaksat iyo Siem imi man,

Siem iyo Noa imi man,

Noa iyo Lamek imi man,

37Lamek iyo Metusela imi man,

Metusela iyo Enok imi man,

Enok iyo Jaret imi man, Jaret iyo Mahalalel imi man,

Mahalalel iyo asegim Kainan imi man,

38Kainan iyo Enos imi man,

Enos iyo Set imi man,

Set iyo Adam imi man e minte,

Adam ita God imi man no ko.